Кога станува збор за намалување на вишокот килограми или промена на разни непродуктивни навики во начинот на живот, голем број луѓе сметаат дека немаат доволно силна волја во тој поглед. Затоа прибегнуваат кон брзи, вештачки, односно „автоматски“ методи, на пример за подобрување на притисокот, градење мускули или слабеење, кои ќе ја „завршат работата“ наместо тоа да го прави самата единка со начинот на живот. Човек што не го променил начинот на исхрана, а ослабел со рестрикции или на брз и нездрав начин, ќе се врати на стариот начин на исхрана со којшто ги качил килограмите. Ако коригирате висок притисок со синтетика (апчиња), а не ја коригирате погрешната исхрана која е примарниот причинител – последиците избиваат на друго место и во друг облик.
Слабеењето или високиот притисок како решение на проблемот мора да содржи повеќе отколку само намалување на килограмите или намалување на притисокот. Мора да го содржи решението за првиот проблем: како се покачиле. Сè додека ова не се реши, ќе има само неуспеси. Потребно е да се промени начинот на исхрана, но и разбирањето за тоа како работи човекот како склоп.
Луѓето се обидуваат да се откажат од цигари на пример, со средства кои предизвикуваат гадење од цигари. Па автоматски самото гадење би предизвикало да не пушат. Или се обидуваат да добијат фокус преку кафе или енергетски пијалоци. Или да добијат смиреност преку апчиња. Секогаш кога кормилото се предава на нешто друго вон единката, следува подлабок неуспех. Започнувањето со подобар начин на живот, отфрлањето на непродуктивни навики и воведување на продуктивни навики мора да биде направено од самата единка. Таа секако може да има помош и водство во тоа – што може да е и клучно – но секогаш единката мора да биде носител на дејството.
Можеби сте се обиделе да намалите со благото, или да ги откажете цигарите, или да не практикувате некои непродуктивни навики, но не сте успеале. Си велите дека немате доволно ВОЛЈА. Но волјата не е главниот предуслов за да се постигне промената.
За да се случи промената, најпрво мора да разберете нешто:
ВАШАТА ВОЛЈА НЕ Е СЛАБА. Во дадени моменти, едноставно не правите разлика помеѓу импулсите на телото и вашите намери. Се обидувате да остварите некоја ваша намера, притоа се појавуваат некакви непожелни импулси од телото, и кога се појавуваат си мислите дека вие ги создавате. Тоа води кон дополнителна демотивација особено ако не ја остварите намерата. Ова се одразува како негативно влијание и врз другите области во животот. На пример сакате да намалите со храната но вам ви се јавува желба за благо, сокови или обилен внес на храна. Се обидувате да се контролирате но не ви успева. Тоа е дополнителна демотивација. Некои луѓе велат: „стрвлија сум си.“ Не постои стрвлија, постојат хормонални сили кои активираат глад и стрв. Гладта, стрвта и ситоста се хормонални реакции, не се карактерни особини. Тие се примарно физиолошки, а не умствен проблем. Кога физиологијата е нарушена, психата не само што страда, туку мора и дополнително да се бори со тој товар.
Телото е биолошки склоп. И како такво, тоа е само еден елемент од поширокиот склоп наречен Човек.
Неконтролираните импулси за јадење или внес на нездрави видои храна за кои луѓето мислат дека се нивни импулси, се вклучуваат или исклучуваат преку начинот на исхрана. Понатаму, се одржуваат на долг рок преку функционално знаење затоа што начинот на живот и исхраната мора да се базираат на вашето лично разбирање, а не да бидат прифатени и практикувани на слепо.
Тогаш вашата волја ќе дојде до полн израз и ќе биде далеку полесно да се спроведе, бидејќи нема толкава опструкција од страна на механизмите на телото.
View this post on Instagram
