Вежбата што следи во прилог е вежба за стомачни мускули која ја дадовме како одговор на едно од прашањата на читател на Мускултура.
Прво да разјасниме нешто.
Мускулите сместени во средиштето на телото се многу битни ако сакаме поголема стабилност на телото, сила и потпора за другите делови. Сите стомачни мускули спаѓаат во средиштето на телото, во кое има и уште неколку други мускули. Тука ќе се задржиме на стомачните.
Постојат четири стомачни мускули и се поставени во три слоја.
Преден, надворешни странични, внатрешни странични и внатрешен стомачен мускул. Стомачните мускули не се само предниот стомачен мускул, оној што најчесто се вежба. Дури и кога велат „горни“ и „долни“ стомачни, тие се сепак дел од предниот стомачен мускул, т.е. горниот слој.
Преден стомачен мускул: RECTUS ABDOMINIS (rectus = исправен/прав)
Потоа, надворешните странични стомачни мускули се наоѓаат на левата и десната страна од предниот стомачен мускул.
Надворешни странични стомачни мускули
А внатрешните странични се поставени под надворешните странични стомачни мускули.
Внатрешни странични стомачни мускули
Најзанемарениот стомачен мускул е внатрешниот, тој се наоѓа во најдлабокиот слој на стомачните мускули. Поставен е под внатрешните странични и предниот стомачен мускул.
Внатрешен стомачен мускул – TRANSVERSUS ABDOMINIS (се нарекува трансверзен бидејќи неговите влакна се поставени трансверзално, односно накрсно во однос на вертикалната средина на стомакот, што значи се поставени хоризонтално)
Неговото зајакнување помага да се спречат болки и повреди во долниот дел од грбот. Тој е природен „каиш“!
Една од неговите функции е да го стабилизираат долниот дел од грбот и карлицата пред да се изведува какво било движење со рацете или нозете. Доколку се практикува вежбата дадена подолу, може да се постигне поголема заштита на ‘рбетот од повреди при кревање и стабилизирање на торзото (средишниот дел на телото).
Друга функција што нѝ е битна овде, е дека со оваа вежба стомачните мускули можат да се затегнат навнатре, особено ако се претходно растегнати заради подуеност на стомакот или други причини. Ова овозможува израмнување на стомакот и подетален изглед на предните стомачни мускули.
Меѓутоа ова е само еден фактор за рамен стомак и видливи стомачни мускули.
(ПРОЧИТАЈ) Како до рамен стомак?
Овој мускул не се вежба со стандардните вежби за стомачни. Се вежба преку правење вакуум односно повлекување на стомакот наназад.
Абдоминални вакууми – вежбата за внатрешниот стомачен мускул
Вежбата се прави со задржување на стомакот навнатре. Напорот треба да е како да сакате папокот да допре до ‘рбетот. Седите или стоите, и стомакот го стегате повлекувајќи го најназад што е можно. 10 пати затегате навнатре и отпуштате (загревање). Потоа држете навнатре 5 секунди и отпуштете. Во првите два-три дена правете го ова 3-4 минути.
Потоа држете по 8-10 секунди. Правете два пати дневно по 5 минути. По три-четири дена, одете на 20 секунди, три пати дневно по 6-7 минути. Понатаму времето на држење треба да се зголемува. Дишењето треба да е сосема нормално додека држите.
Вежбата се прави на празен стомак (да поминат најмалку 3 саати по јадење). Доколку ја правите вежбата без да се придржувате целосно како што е опишано овде, може да се јават непријатни болки во пределот на стомакот.
Се надеваме дека оваа вежба веќе нема да биде најнепознатата вежба за стомачни мускули.
