Исхрана за мускулен раст и ментален мир

Мускулен раст

Стандардната, класична школа вели вака:

„По тренинг ти требаат јаглехидрати за да се обнови гликогенот и да се поддржи мускулниот раст. Пред тренинг исто така ти требаат јаглехидрати за да имаш енергија за кревање.“

Значи каде и да се свртиш, јаглехидрати. Тие не се лоши сами по себе, нивната количина ја прави разликата. Потенцирам – количината, иако многу често се зборува за изворот од каде доаѓаат (на пример има разлика помеѓу бисквити и грав). Изворот е секако важен, но целокупната количина е примарна.

Една од првите работи што ги приметив лично кај себе откако сум во кетоза (речиси 10 години веќе), е дека опоравокот помеѓу серии во даден тренинг и помеѓу тренинзи е ЗНАЧИТЕЛНО поквалитетен и побрз. Не само тоа, туку во втората серија имам повеќе сила отколку во првата и низ сериите силата и енергијата не доживуваат нагли падови. Низ годините досега ова е стандардна појава потврдена од многу вежбачи на нашите програми.

Науката го потврдува истото и вели:

Во периодот на опоравок по тренингот, воспалението е поголемо ако се консумира храна со висока содржина јаглехидрати, во споредба со храна со ниска содржина јаглехидрати.

Ова е толку вистина што ако денес внесете поголема количина јаглехидрати, ќе почувствувате (благи но забележителни) воспаленија на мускулни групи кои сте ги вежбале пред 3-4 дена (за да го проверите ова треба да сте во ефективна кетоза). Иако благи, сепак ќе бидат посилни од воспаленијата кои сте ги чувствувале на денот на тренингот и следниот ден-два.

Намаленото воспаление овозможува ПОСИЛНИ тренизни, поресторативно спиење, побрз опоравок (мускулен раст) и помало ниво на насобран стрес, наместо хронично покачен кортизол.

Затоа правилно спроведена кетогена исхрана е супериорна за чист мускулен раст.

Доколку сте имале вишок сало и складирана вода и шеќер (гликоген) во мускулите, со кетогената исхрана вашиот обем – зависно од тоа како ја спроведувате – може да се намали, а мускулната маса да расте. Обемот од сало/вода/шеќер и обем од мускулна маса се драстично различни состојби и од здравствен и од естетски аспект. Со тек на време при правилна исхрана и вежбање, постигнувате рекомпозиција на процентот на масти и мускул во вашето тело.

Примитивното верување дека јаглехидратите се неопходни за живот и за активност е побиено од сите аспекти. И покрај тоа, таквото верување сè уште постои кај најголемиот број спортисти, вежбачи, спортски тренери, нутриционисти и лекари и тие се водат по него како главна основа во нивните програми или совети. Тие сметаат дека се држат до медицински издржани совети, но сепак медицината вели друго:

„МИНИМАЛНАТА КОЛИЧИНА НА ЈАГЛЕХИДРАТИ ПОТРЕБНА ЗА ЖИВОТ Е НУЛА, ДОКОЛКУ СЕ ВНЕСУВААТ СООДВЕТНИ КОЛИЧИНИ НА ПРОТЕИНИ И МАСТИ.“

Мир во умот

Правилно спроведена кетогена исхрана е антивоспалителна за целиот организам, не само за мускулите при тренинг. Овој антивоспалителен ефект се протега во секој здравствен поглед. Науката смета дека воспалителните т.е. инфламаторни процеси се еден од главните фактори во речиси сите заболувања, особено во дијабет, срцевите заболувања, алцхајмерова болест (која уште и ја нарекуваат дијабет тип 3, е најчестата причина за деменција), канцер, а сега сè повеќе се увидуваат ефектите и врз разни ментални состојби како депресија, анксиозност, панични напади, негативни мисли.

Денешен човек кој има анксиозност или депресија, кој најверојатно се храни со стандардна исхрана – има организам кој е постојано под напад. Во тоа тело наместо хармонија владее инфламација. Таа е сама по себе ГОЛЕМ СТЕПЕН НА СТРЕС. Со таков товар, секој човек е далеку, далеку посклон кон влошување на менталната состојба.

Кога ќе ги средиме овие инфламаторни процеси, најчесто исчезнуваат или значително се намалуваат ваквите негативни состојби.

Затоа, физичката и умствената состојба на единката се значително подобри под правилно изведена кетогена исхрана отколку под исхрана со висока содржина јаглехидрати (кај истата единка).

Дино Николиќ
Креатор и автор на Мускултура
20.01.2026