Здрава храна и правилна исхрана не е исто

Вежбањето и јадењето здрава храна, сами по себе не носат раст на мускулна маса или губење вишок сало.

Кога велам правилна исхрана во однос на вежбање со тежини, градење мускулна маса, губење вишок масти – не мислам на здрава храна. Многу луѓе мислат ако нешто е здраво тогаш тоа е во потполна согласност со градење мускули.

Не е така.

Медот се смета за здрав. Овошјата, оризот, овесот исто така. Но сепак фактот е дека овие содржат јаглехидрати кои во телото се претвораат во шеќери. Покаченото ниво на шеќер во крвта го намалува хормонот за раст а го качува инсулинот = се успорува растот на мускулна маса, се прекинува топењето вишок масти. Или, зависно од количината = предизвикува дебелеење.

Разните „трендови“ во исхраната и советите за здравје најчесто се проповедаат и прифаќаат на слепо, како догма. „Здраво е“, „корисно е за организмот“…

Зошто е здраво? Бидејќи содржи Ц-витамин? Здраво е за коските дека содржи калциум? Здраво е дека е природно?

Природно и правилно се различни работи. Многу производи се фалат со „природно“ и „природни состојки“. Нафтата е природна. Змискиот отров е природен. Алкохолот е природен. Овесните снегулки се природни. Ураниум, халуциногени печурки, сè е тоа природно.

Значи можеме да заклучиме дека „природно“ не кажува многу.

Вештачки витамин Е не е природен, но е поправилен од никаков витамин Е. Постојат степени на исправност и тоа не е сè црно и бело. Ц витамин е супер, но колку? 60 милиграми или 1000? Ова дава малку подруг поглед на работите.

Ова бара вистинско, а не површно знаење.

Ова бара паметна исхрана и паметно вежбање за да се постигнат саканите цели.

Фактите

Кога станува збор за раст на мускулна маса и топење вишок масти – единствените валидни прашања и одговори се тие што се однесуваат на ефектот што исхраната го има врз хормоните.

Црешите се здрава храна. Несомнено. Меѓутоа 100 грама цреши (15-ина црешки) содржат 14 грама шеќер. Малку повеќе од 100 грама кола-сок. Содржат околу 7 милиграми витамин Ц. Дневниот најминимален внес на витамин Ц треба да е 1000 милиграми. Дали сакате да внесете 13 грама шеќер заради 7 милиграми витамин Ц?

„Здраво е во умерена доза.“ Вакви општи изјави што звучат мудро а без да кажат што е умерена доза – не се од никаква корист. Хормоните не се ракводат по општи мудрости.

Една излупена банана тежи околу 100 грама. Содржи 20 гр јаглехидрати од кои 12 гр чист шеќер.

Една праска тежи околу 150 гр. 16 грама јаглехидрати од кои 13 се шеќер.

Да не заборавиме дека шеќерот е 100% чист јаглехидрат.

Две кришки леб содржат 25 грама јаглехидрати. Интегрален леб? Исто.

15 црешки, една банана, една праска, две кришки леб = 75 грама јаглехидрати.

75 гр јаглехидрати внесени во текот на еден ден за голем број луѓе значат дека нема топење вишок масти. Значат нема излачување максимум хормон за раст колку што би требало да се постигне заради вежбањето со тежини. Во старт лишување од неговите подмладувачки придобивки.

Овесни снегулки? 100 грама овесни снегулки содржат 56 грама јаглехидрати. Вивнуваат инсулин исто како да сте изеле 100 гр чоколадо. Слично е и со други житарици. Јачменот содржи 56 гр јаглехидрати. Разните комбинации од мусли содржат околу 50 гр јаглехидрати на 100 грама и околу 30 гр шеќер.