Мускулни влакна
Телото има неколку видови на мускули или мускулни влакна, но тука зборуваме за скелетните мускули. Тоа се мускулите поврзани со скелетот и се дел од механичкиот систем кој го движи телото. Тоа се мускулите кои сакаме да ги зголемиме и дефинираме.
Од овој тип на мускули постојат два вида мускулни влакна: брзопотезни и споропотезни или брзи и спори. Брзопотезните мускулни влакна се нарекуваат и бели мускули а споропотезните – црвени мускули.
„Потезно“ се однесува на брзината на контракцијата или затегнување на мускулот при негово користење или напрегање. Овие два типа на мускули се активираат различно во зависност од видот на вашата активност. Составот на вашите мускули може да биде променет за да содржи повеќе брзи или спори влакна.
Тука најмногу нè интересираат брзопотезните мускулни влакна. Доколку сакаме дефинирано, цврсто, бодибилдерско или атлетски градено тело – треба да тренираме на начин кој ги активира брзопотезните влакна. Тренирањето на брзите влакна е поефективно за раст на мускулите и топење масти отколку тренирањето на спорите влакна.
Составот на мускулите
Секој сноп од мускулни влакна е составен од брзопотезни и споропотезни влaкна. Секој човек има одреден сооднос на овие два типа влакна. На тој сооднос може да се влијае во полза на брзите или спорите мускулни влакна, преку одредени видови на вежбање. Видот и интензитетот на вежбањето одредува кој тип на мускулни влакна ќе доминира во телото.
Црвени мускулни влакна
Црвените влакна се наречени споропотезни бидејќи се направени за издржливост. Овие мускули се активираат за долготрајни напори. Тие поспоро се контрахираат (стегаат) но овозможуваат подолготрајно вежбање. Маратонците, велосипедистите и веслачите многу зависат од црвените мускулни влакна. Влакната се буквално црвени по боја заради големата количина крвни садови кои се испреплетени со нив. Крвта им овозможува на овие влакна да произведуваат енергија за подолги временски периоди. На пример аеробик со низок интензитет или кревање тежини со низок интензитет ги активира овие црвени влакна. Не е возможно да изградиме голема мускулна маса преку правење вежби кои ги активираат во главно црвените, споропотезни влакна. Црвените влакна се многу ограничени во својот потенцијал за раст. Белите не.
Бели мускулни влакна
Белите мускулни влакна се нарекуваат брзопотезни бидејќи тие се стегаат за помалку од една стотинка. Нивните контракции се овозможени од кислородот и тој допринесува за нивната бела боја. Спринтерите може да имаат до 80% бели влакна отколку црвени бидејќи нивното трчање се потпира на белите, брзи влакна. Белите влакна побрзо се уморуваат од црвените. Затоа белите влакна најдобро се тренираат со експлозивна сила и брзина, како кревање големи тежини со малку повторувања или спринтови. Мускулната маса која ја гледате кај бодибилдерите на пример, е составена во главно од бели влакна.
Топење масти и градење мускули
Брзопотезните мускулни влакна согоруваат повеќе сало за време на тренингот и по негово завршување. Тренингот кој ги активира во главно брзите влакна е интензивниот тренинг, заради употребата на сила и брзина. Како резултат на ова, телото излачува повеќе хормон за раст и тестостерон. Тие ги топат мастите и градат поголеми мускули. Ова предизвикува раст на мускулната маса и намалување на вишокот сало, долги часови и по завршување на тренингот.
Кревање мали тежини или вежбање аеробик на пример, ги активира спорите влакна а тоа е од полза за срцевото здравје, дишниот систем но не и за зголемување на мускулната маса или значително топење сало.
Брзопотезните влакна и годините
Како што човек станува постар така сè повеќе брзопотезни мускулни влакна стануваат споропотезни. Тоа резултира во намалување на мускулната маса и успорување на метаболизмот. Ако седиме со скрстени раце.
Ова може да се промени со тренинзи кои ги активираат брзите влакна. Не само што конверзијата од брзи во спори влакна ќе се намали, туку ќе се одржува и зголемува веќе постоечката мускулна маса, ќе се спречи гомилање сало и ќе бидеме поактивни и поенергични.
Правец на тренирање
Зависно од посакуваниот резултат, може да се одреди каков вид на вежбање е потребен и колку долго да траат тие вежби. Доколку сакаме да вежбаме за временска издржливост, треба да ги активираме споропотезните мускулни влакна. Тие се тренираат со вежби со понизок интензитет, мали тежини, споро и со поголемо времетраење. За да ги активираме брзопотезните мускули потребни се експлозивни активности, на пример спринтови или вежбање со големи тежини со помалку но побрзо изведени повторувања.
