Вежбата што следи во прилог е вежба за стомачни мускули која ја дадовме како одговор на едно од прашањата на читател на Мускултура.
Прво да разјасниме нешто.
Мускулите сместени во средиштето на телото се многу битни ако сакаме поголема стабилност на телото, сила и потпора за другите делови. Сите стомачни мускули спаѓаат во средиштето на телото, во кое има и уште неколку други мускули. Тука ќе се задржиме на стомачните.
Постојат четири стомачни мускули и се поставени во три слоја.
Преден, надворешни-странични, внатрешни-странични и внатрешен. Стомачните мускули не се само оние што најчесто се вежбаат за постигнување поубав изглед – предните стомачни мускули. Дури и кога велат „горни“ и „долни“ стомачни, тие се сепак дел од предниот стомачен мускул, горниот слој.
Надворешните-странични се поставени од левата и десна страна на предниот стомачен мускул.
Внатрешните-странични се поставени испод надворешните-странични стомачни мускули. Внатрешниот стомачен мускул е поставен испод внатрешните-странични и предниот стомачен мускул.
Внатрешен стомачен мускул
Најзанемарениот стомачен мускул е внатрешниот, кој се наоѓа во најдлабокиот слој на стомачните мускули.
Неговото зајакнување помага да се спречат болки и повреди во долниот дел од грбот. Тој е природен „каиш“!
Една од неговите функции е да го стабилизираат долниот дел од грбот и карлицата пред да се изведува какво било движење со рацете или нозете. Доколку се практикува вежбата дадена подолу, може да се постигне поголема заштита на ‘рбетот од повреди при кревање и стабилизирање на торзото (средишниот дел на телото).
Друга функција што нѝ е битна овде, е дека со оваа вежба стомачните мускули можат да се затегнат навнатре, особено ако се претходно растегнати заради подуеност на стомакот. Ова овозможува израмнување на стомакот и подетален изглед на предните стомачни мускули.
Меѓутоа ова е само еден фактор за рамен стомак и видливи стомачни мускули.
(ПРОЧИТАЈ) Како до рамен стомак?
Овој мускул не се вежба со стандардните вежби за стомачни. Се вежба преку правење вакуум односно повлекување на стомакот наназад.
Вежбата за внатрешниот стомачен мускул
Вежбата се прави со задржување на стомакот навнатре. Напорот треба да е како да сакате папокот да допре до ‘рбетот. Седите или стоите, и стомакот го стегате повлекувајќи го најназад што е можно. 10 пати затегате навнатре и отпуштате (загревање). Потоа држете навнатре 5 секунди и пуштете 5 секунди. Правете го ова 3-4 минути вкупно со држење и пуштање, во првите два-три дена.
Потоа држете по 8-10 секунди држење со 8-10 одмор. Правете по 5 минути два пати дневно. Три-четири дена по ова, одете на 6-7 минути три пати дневно. Понатаму времето може постепено да се зголемува.
Обавезно дишењето да биде нормално за време на вежбата. Да не се прави на гладно но не и на преполн стомак. Треба да сте добро хидрирани во текот на денот. Исто така треба да испиете околу 200 грама вода 20-30 минути пред вежбата. Доколку ја правите вежбата без да се придржувате целосно како што е опишано овде, може да се јават непријатни болки во пределот на стомакот.
Се надеваме дека оваа вежба веќе нема да биде најнепознатата вежба за стомачни мускули.
