Мртви кревања (deadlifts) – незаменливи за силно и добро градено тело

Вежбата мртво кревање е една од најмоќните вежби бидејќи таа работи на многу мускули одеднаш. Го активира целото тело и ваквата активација е клучна за повисок хормонален одзив на тестостерон и хормонот за раст. Формата со која се изведува вежбата е многу важна за да го извлечете максимумот од неа, но и за да спречите можни повреди. Затоа е важно да знаете како да правите мртви кревања со правилна форма.

Исправниот начин како да правите мртви кревања

1. Стапала треба да ви бидат под средината на шипката, на ширина како колковите. Наведнете се до ниво на колковите за да ја фатите шипката. Грбот малку подвиткан навнатре и стегнат. Рацете треба да се поставени на ширина како рамењата. При поголеми тежини, шипката држете ја со едната дланка свртена накај вас, а другата свртена нанапред.
2. Земете воздух и спуштете ги колковите виткајќи ги колениците надолу. Потколениците треба речиси да допираат до шипката. Главата треба да ви биде исправена и да гледате напред. Испакнете ги градите и држете го грбот малку подвиткан навнатре (никако згрбавен). Буткајте со петиците за да ја кренете тежината нагоре.
3. Откако шипката ќе ги помине колениците, повлечете ја наназад и истовремено соберете ги лопатките а колковите придвижете ги малку нанапред накај шипката. Ова движење  го правите со долниот дел од грбот.
4. Спуштајте ја шипката до подот наведнувајќи се со грбот. Додека спуштате надоле, шипката треба речиси да ви ги допира потколениците.
5. Издишувајте додека спуштате.

Мускули кои се вежбаат со мртви кревања:

• Горните делови од нозете (заден, преден, внатрешен и надворешен)
• Задникот
• Листовите
• Долниот дел од грбот
• Трапезот
• Вратните мускули
• Ромбоидните мускули
• Стомачните (предни и странични)

Вежбајте како да правите мртви кревања со правилна форма правејќи ги чекорите најпрвин само со шипка. Правилната форма е поважна од тежините, бројот на повторувањата и сериите.