Хормони, дефиниција и опис

Хормони се супстанци произведени од одредени жлезди во телото. Тие се транспортираат во телото преку внатрешни течности со цел да ги регулираат дејствата на клетките и органите. Изведуваат специфични биолошки функции и овозможуваат комуникација помеѓу органите и ткивата со цел да се регулираат физиолошките (телесни) функции како што се варење на храната, дишење, сетилни перцепции, сон, лачење, формирање и развој, движење, репродукција, итн.

Зборот хормон потекнува од грчкиот збор hormon што значи „тоа што покренува движење“.

Хормоните регулираат сè што се случува во вашето тело. Тие се најмоќните биолошки двигатели познати на науката. Целиот хормонален систем во телото е меѓусебно поврзан. Затоа промена на еден хормон значи промена на сите хормони.

Хормоните се тие кои го насочуваат телото кон градење мускулна маса, топење масти, јакнење на густината на коските. Но исто така некои од хормоните го прават токму спротивното. Затоа, вежбањето со тежини може многу прецизно да се дефинира:

Вежбањето со тежини е метод за регулирање и насочување на хормоните во посакувана насока.

Тоа значи зголемување на хормоните кои влијаат позитивно на телесниот состав и на оние кои се клучни за градење мускулна маса, а намалување на хормоните кои попречуваат градење мускулна маса, кои активираат гомилање сало, кои ги „трошат“ или „јадат“ мускулите.

Овде не се опишани сите функции на наведените хормони. Опишани се дел од позитивните и негативните карактеристики кои најмногу нè интересираат за градење мускулна маса и топење на вишокот масти. Негативните карактеристики на некои од хормоните не значат дека тие хормони не се неопходни за други функции во телото.

Хормоните имаат директно и главно влијание врз формата, структурата, составот на телото (мускулно/масен сооднос) и стареење.

Човечкото тело има 50-ина хормони, но овде ќе ги опишеме оние кои нѝ се од најголемо значење за вежбањето со тежини, градење мускулна маса и губење на вишокот сало.