Правилната исхрана е суштинска за постигнување посилно и добро градено тело. Правилна исхрана не значи само да се јаде здраво, туку што, колку и во кој сооднос. До одреден степен тоа зависи и од категоријата во која спаѓа вашето тело: слаба, салеста или мускулеста форма.
За потребите на зголемување на мускулната маса и намалување на вишокот сало, во игра се шест фактори од аспект на исхраната:
- Калории
- Протеини
- Јаглехидрати
- Масти
- Вода
- Суплементи
Калории
Зборот калорија доаѓа од латинскиот calor што значи топлина.
Калорија е единица мерка за енергија, односно топлина.
Колкава енергија е 1 калорија (1 kcal) од храна? За да разбереме колкава е таа енергија, ќе ја погледнеме од аспект на топлина. 1 калорија претставува вредност во енергија колку што е потребно за да се зголеми топлината на 1 килограм вода за 1 °C.
Топлината во телото е резултат од согорување на калории – енергија чија сировина се добива преку исхрана (плус вода и кислород).
- 1 грам протеини има енергетска вредност од 4 калории.
- 1 грам јаглехидрати има енергетска вредност од 4 калории.
- 1 грам масти има енергетска вредност од 9 калории.
Постои една груба равенка која вели дека ако внесуваме повеќе калории отколку што трошиме, тогаш телесната тежина ќе се зголемува. Ако внесуваме помалку калории отколку што трошиме, тогаш телесната тежина ќе се намалува.
Кога станува збор за селективно зголемување или намалување на тежина (мускулна маса или сало), оваа равенка не прави разлика какви калории се внесуваат и каква маса се добива или губи. Сите калории не се исти.
Иако протеините и јаглехидратите се со иста калориска вредност, нивните ефекти врз телото се сосема различни. Тие активираат хормони со различни, спротивни ефекти врз градењето мускулна маса/губење сало.
Протеини
Протеините се материјалот кој телото го користи за зголемување на мускулната маса. Ова во главно се одвива после тренингот преку активација на хормоните кои го спроведуваат зголемувањето на мускулната маса.
За раст на мускулите и топење на вишокот сало – од аспект на исхрана најважно е да се намали внесот на јаглехидрати а да се зголеми внесот на протеини и масти. Не треба значително да се намалува внесот на здрави масти.
Преголеми количини протеин особено без истовремен внес на масти ќе го покачат инсулинот повеќе од потребното. Во тој случај се прекинува процесот на согорување вишок телесни масти. Kоличините не се исти за секого. Тоа што за некој е преголемо за некој друг може да биде премалку зависно од повеќе индивидуални фактори.
