Диетални влакна и хормоналниот систем

Балансот на хормоните може да се наруши заради повеќе фактори. Хормоналниот систем функционира толку поврзано што кога еден хормон излегува од баланс, и другите излегуваат. Факт е дека исхраната има огромна улога во постигнувањето и одржувањето хормонален баланс. Овде ќе обрнеме внимание на еден многу важен дел од исхраната – диетални влакна.

За правилно функционирање на хормоните неопходно е да се внесува доволна количина диетални влакна.

Диеталните влакна имаат многу позитивни ефекти врз телото, но нас најмногу нè интересираат овие три:

• Нормализирање на шеќерот во крвта
• Намалување на нивото на кортизол
• Исфрлање на вишокот естроген

Иако влакната се сметаат за јаглехидрати, тие не се разложуваат во телото и не се претвораат во шеќер. Затоа не го покачуваат шеќерот во крвта како другите јаглехидрати и не предизвикуваат одзив на инсулин.

Видови диетални влакна

Постојат два вида диетални влакна, растворливи и нерастворливи.

Растворливите влакна се раствораат во вода и помагаат да се успори минувањето на храната низ дигестивниот систем. Ова помага во варењето и апсорпцијата на храната.

Тие се буквално храна за добрите бактерии во цревата. Кога земате пробиотик, всушност внесувате некои од истите добри бактерии какви што се наоѓаат во цревата.

Растворливите влакна се ПРЕБИОТИК, односно тие ги хранат добрите бактерии (пробиотиците) и им овозможуваат да се размножуваат и да бидат присутни во доволна количина која е потребна за варење на храната, производство на одредени витамини, јакнење на имуниот систем…

Помагаат да се намали шеќерот во крвта, а со тоа и одзивот на инсулин, хормонот кој шеќерите ги претвора во масти и ги складира.

Нерастворливите влакна (не можат да се растворат во вода), помагаат храната да помине низ желудникот и цревата. Ги чистат цревата. Помагаат во елиминација на токсините од телото. Помагаат столицата да се сврзе со вода (доколку внесувате доволно вода). Водата ја омекнува столицата и тоа помага во исфрлањето.

И двата вида диетални влакна се составен дел на правилната исхрана и силен имунитет.

Ефект врз хормоните

Влакната не само што помагаат да се намали шеќерот во крвта туку и помагаат за негов баланс. Исхрана богата со диетални влакна ќе ви помогне да се чувствувате заситени подолго време. Тоа е особено значајно за намалување на вишокот сало.

Тие помагаат да се намали нивото на кортизол и тоа влијае многу позитивно врз сите други хормони. Со тоа помагаат и против дебелеење бидејќи високо ниво на кортизол води кон дебелеење а тоа води и кон зголемено ниво на естроген, во превод – хаос за хормоните.

Добар внес на диеталните влакна ќе придонесе за елиминирање на вишокот естроген кој директно го пореметува балансот на хормоните и кој влијае врз гомилање сало.

Диеталните влакна може да се внесат преку многу видови храна. Потребно е да внесувате и растворливи и нерастворливи влакна.

Важно е да не внесувате премногу јаглехидрати за сметка на диеталните влакна. На пример шеќери.

Храната што содржи малку јаглехидрати ја одвоивме со знакот √.

Храна што содржи растворливи влакна:

• Грав
• Леќа
• Ленено семе √
• Овесни снегулки
• Крушки
• Портокали
• Јаболки
• Чиа семе √
• Карфиол √
• Јагоди, боровница, малина √

Храна што содржи нерастворливи влакна:

• Сушено овошје
• Брокула, зелка, краставица √
• Целер √
• Лук, кромид, праз √
• Зрнеста храна (овес, јачмен, ориз…)
• Тврдо овошје √
• Карфиол √
• Семиња √

Дневен внес на диетални влакна

Најдобро е диеталните влакна да ги внесувате преку разни видови храна особено зеленчук и тврди овошја. Наглиот внес на премногу диетални влакна може да предизвика дигестивни потешкотии и подуеност на стомакот. Почнете и постепено достигнете ја количината од 40 грама диетални влакна дневно. На пример 100 грама зелка содржи 3 грама диетални влакна, 100 грама краставица содржи нешто помалку од 1 грам (речиси половина од влакната во краставицата се во лушпата). Тврдото овошје содржи околу 8-10 грама влакна, а чиа семето содржи 38 грама влакна на 100 грама. Диетални влакна може и да се купат како суплемент во прав.

Една од најголемите грешки што можете да ја направите во исхраната, особено во кето диетата е да не внесувате доволно зеленчуци. Не само заради влакната туку овие зеленчуци се богати со нутриенти кои се секако потребни за телото.